حــــــكــــايــــات وزكــــريــــات ديــــابــــيــة الحلقة الاولى ( اللـــــيلادى )

السلام عليكم
السادة المشرفين والاعضاء
الفكرة دى فى دماغى والله من شهر
بس كنت مستنى لما اشوف الشكل النهائى لها
والفكرة عبارة عن حكاياااااااااااااااات وذكريات ديابية
بمعنى:
انا هختار البوم واتكلم عنه شويه يعنى نزل امتى ايه اللى حصل لعمرو وجمهوره فى الوقت ده والجوايز اللى عمرو خادها والحفلات وكده
بعد كده هتكلم عن الذكرى اللى حصلت وقت نزول الالبوم ده وبيفكرنى بايه؟؟؟
وبعد كده هقول انطباعى عن اغانى الالبوم ورأيى فيها
واخر حاجة هديله لقب
وهبدأ انا انفذ علشان الفكرة توضح اكتر

الحلقة الاولى ::::::::
اللـــــــــــيــــــــــلادى
نبذه عن الالبوم ::
الالبوم ده نزل يوم 7/7/2007 ( يوم تاريخى ) وكان ب 15 جنيه ومكون من 10 اغانى رائعة
وده كانت بداية ناس جديدة اول مرة تشتغل مع عمرو زى الموهوب الموزع ( حسن الشافعى )
فى نفس الوقت كانت عودة الشاعر حبيب عمرو وحبيبنا كلنا الاستاذ ( مجدى النجار )
وطبعا كلنا فاكرين الانتقادات اللى خدها عمرو عن اللوك وعن الالبوم
وفاكرين كمان المؤامرات اللى عملتها روتانا علشان الالبوم ما يتوزعش كويس
رغم كده والحمد لله الالبوم عمل اعلى مبيعات تكاد تصل الى 3 او 4 مليون نسخة
والحمد لله حصل الاسطورة على الورلد ميوزك اوورد للمرة الثالثة علشان يثبت ان هو الاول والافضل
والحمد لله جمهور دياب وقف جمبه كالعادة وكان اد ثقة عمرو لما قال:
انا راهنت على جمهورى وكسبت الرهان
وطبعا من اروع الحفلات اللى بعد الالبوم الحفلة الاسطورية واللى جابهلنا الاسطورة عللولى
وهى حفلة مارينا

الذكرى الشخصية والحدث ::
كانت ايام جميلة بجد فى الوقت ده كنت فى القاهره عند عمى فخرجنا بره نتمشى شويه فى ميدان التحرير
وكانت المفاجاه الجامده اللى كنت مش متوقعها خالص
البوستر كان بيتركب على عماره
بوستر 5 فى10 متر والله والكشفات فيه كده
الناس كانت واقفه كانها يتتفرج على لوحه فنيه كان منظر مش هنساه ابدا كان مدان التحرير ده محدشيعرف يمشى فيه من زحمه الناس اللى كانت بتتفرج على البوستر

وبجد الايام دى كانت جميلة جدا لأنى كنت دايما مع اصحابى وكلنا كنا ديابية وفرحانين جدا بالالبوم
والله العظيم انا اول ما سمعت السمبلز اللى كانت نازلة من فودافون حلفت لواحد صاحبى ان
الالبوم ده هيكسر الدنيا وهياخد الجائزة العالميه عليه لأنه معتمد على صوت عمرو من الدرجة الاولى
ومش قادر اقول لكم اد ايه الالبوم ده انتشر فى كل مكان فى العربيات الملاكى وفى التاكسى
والسيرفيس الل دايما بيشغلوا شعبى لاقيتهم مشغلين عمرو وكمان فى الافراح اساسى لازم تلاقى
على الاقل 3 اغانى لعمرو وحتى اصحابى اللى مش مغرمين اوى بعمرو من كتر ما سمعوه فى كل مكان
اشترو الالبوم وادمنوه .... بجد كانت من اجمل الايام والاجازات لأنى لفيت فيها كتييييير وفى كل مكان
كان دايما الالبوم ده معايا فى المنصورة والقاهرة واى مكن اروحو

الانطباع ::
نــقــول ايــه : دخلت قلبى بسرعة وحبيتها جدا من يوم ما سمعت السمبل بتاعها واداء عمرو فيها لا يوصف
اللــيــلادى : جديدة على عمرو واغنية رائعة ومن اجمل اغانى المناسابات وخصوصا الافراح وتدعو للسعادة
طــول مـا انـا شـايـفـك: تفكرنى بعمرو القديم وباغنية وياك بحلم اعيش وفيها تناغم رائع بين عمرو ومجدى النجار
حــكـــايــات : عالم تانى بجد واغنية للتاريخ واول ما سمعته اتوهمت وقلت مش ممكن تكون دى اغنية
قمة فى الرومانسية لدرجة ان واحد صاحبى اول ما سمع ( انساك لا يا حبيبى ) عيط والله
انــت الـــغـــالى : من اخف الاغانى على قلبى ودايما بتحسسنى بالفرح وبصراحة شفت بنت جميلة جدا بترقص عليها فى فرح
روحــى مــرتــحـالك : رسالة من اجمل رسائل الحب اللى بتختصر الطريق وتجيب من الاخر
قــالــتـلى قــول : قصة ممتازة من الممتاز بهاء الدين واروع من العبقرى عمرو فى لحنها وادائها ودى الاغنية الوحيدة
اللى لو بسمعها وانا نايم لازم اصحى وافوق علشان افهمها
وفــهمـت عــيــنيك : عودة للرومانسية الغير طبيعية واللى عودنا عليها الاسطورة باحساسه الفوق ممتاز
ضــحــكــت : فاكهة الالبوم ودى الاغنية الوحيدة اللى كل اصحابى اللى ما بيسمعوش عمرو بيحبوها جدا
خلـــيـــك مــعــايــا : بجد اول ما سمعتها اتصدمت واتهزيت من جوايا وعيشت فى عالم تانى خالص
وبصراحة اتمنيت اقولها لحبيبتى بس عقلى هو اللى مانعنى لأن القرار النهائى دايما لعقلى
وقولت مفيش حب من غير جواز علشان كده كتمت حبى فى قلبى وما اتكلمتش

اللقب ::
الالبوم الاســـــــــطــــــــورى
وياريت تكون الفكرة وضحت
وعايز بقى اللى يرد لو سمحتم يقول رأيه فى الموضوع ويقول الذكرى العامة اللى حصلت له وانطباعه عن الاغانى
وصدقونى والله بتبقى زكريات جميلة ولما بنفتكرها بنقول (( كانت زكرى وعيشنالنا يومين ))
ويارب تعجبكم
وآسف جدا للإطالة
وشكرا

نايس ياتوسا
تسلم ايدك ياقمر

يا عينى عليك يا احمد
بجد توبك حلو اوى