يعنى ايه كوك زيرو..وكوك فقرى!!

كيد كله شاف اعلان كوك زيرو..يعنى حاجات تتحقق من غير ما تتوقعها..يعنى والدك يشتريلك ارض فى الشروق ويطلع فيها بترول..وهى ده العيشة مع كوك زيرو..طب تفتكروا فى وسطنا الرياضى كام واحد بيضرب كوك زيرو..تفتكروا كام واحد اتغيرت حياته..و كام واحد مشيت معاه بارادة الله..تعالوا نكشف اسرار كوك زيرو..مع الوسط الرياضى..من خيال المؤلف فقط!!
كوك زيرو يعنى انك..
• تبقى جمهور الزمالك..وتبقى شايل الغلب من الزمالك..وتتغلب من طوب المريخ بعد ماخلص طوب الارض..وييجى حسام حسن يخليك تزعل عشان اتعادلت مع الاسماعيلى فى الاسماعيلية..بعد 8 فوز متتالى..عظيم ايها الجمهور.
• تبقى حسام حسن..ولسه داخل عالم التدريب..وفجأة تبقى احسن مدرب بفضل اخلاصك.. وتخطف الاضواء..ويرجع الزمالكاوية تانى واثقين فى فريقهم.
• تبقى حسين ياسر..وييجى التوام يضمك بعد ما كنت اسير الدكة فى الاهلى ..وتكمل ماتشات للاخر رغم انهم كانوا بيقولوا عليك مفيش لياقة..وتبقى صانع السعادة لجماهير الزمالك ومعشوقها..مرتديا تى شيرت العظيم..حازم امام 14.
• تبقى احمد جعفر..وتتركن فى عهد ميشيل..ويمشى ميشيل..ويمشى ميدو.. ويمشى زكى ..وتبقى المهاجم الاول فى الزمالك..و سبحان الله.
• تبقى عمرو الصفتى..وتطالب بالرحيل..فييجى حسام يخليك من اهم السرد باكات المقاتلين فى مصر.
• تبقى احمد غانم..وتهتف الجماهير ضدك..وتشتمك..قبل واثناء وبعد الماتش..فايز.. مغلوب..متعادل..برة الـ 18..و ييجى حسام..فيخليك واحد من احسن الباكات بجد.. لا و كمان اشاعات ان الاهلى بيفاوضك!!
• تبقى هانى سعيد..ويخليك من مجرد لاعب متألق فى كثير من الاحيان..او غلطاته تضيع فريق ..الى لاعب بينزل فى اوقات حاسمة عشان يظبط رتم الاداء.
• تبقى علاء على..ومش بس تدخل الـ18 فى عهد حسام..لا وكمان تبقى لاعب من الاعمدة الرئيسية للفريق..ويمكن كمان تطالب بزيادة عقدك اخر الموسم.
• تبقى حسن مصطفى..وناس زمالكاوية كتير ماكنتش عايزاك..وييجى العميد يدب فيك روح حسن مصطفى بتاع زمن..فيبقى رمانة الميزان.
• تبقى ابراهيم صلاح..لاعب طموح تكسرت طموحاته امام الاجانب..و فجأة يزيل حسام عنك الصدأ عشان يكتشف لنا تامر عبد الحميد جديد.
• تبقى شيكابالا..وترجع الساحر اللى عرفناه..وتلعب براحتك بعد ما كنت كل ماتش تشتبك مع الجماهير..ويتشتت ذهنك مع لاعبين قله كادوا يفسدوك!!
• تبقى ناشىء من ناشئى الزمالك..وتعرف ان العميد بيراقبك من بعيد.
• تبقى مجلس ادارة الزمالك..وتتحول احباطاتك..ومحاولاتك..وسن السكاكين حواليك.. لتعيين حسام..فتبقى الدنيا كلها وردى..وممكن تاخد دورى..والعملية تمشى معاك زى الفل..إى والله فل.
• تبقى جمال حمزة..وتروح تحترف..وتفشل..وترجع..فالزمالك يرفضك..والجونة ينقذك..فييجى الاهلى يضمك..الله عليكى يا كوكا!!
• تبقى سمير زاهر..وتضحك على الناس بشريط السودان..وتوهم الناس ان فضل الكرة المصرية بفضل حنكتك..والناس كانت حتقلب عليك..فييجى حسن شحاتة يخطف الكاس فى انجولا..وبرضوا تروح تسلم عالريس..والناس تتلهى عنك.
• تبقى مرتضى منصور..والناس زهقت من قضاياه..اللى مفيش حكم بيتنفذ ليه..وييجى ياخد حكم بوقف شوبير..والحياة تفسخ العقد معاه..فيبقى الانتصار مرتين.
• تبقى محمود بكر..احد عمالقة التعليق فى الماضى..ورويدا ظهور جيل من مثقفى الكورة اللى مالهمش حل..فتستغلك دريم انك تبقى فقرة كوميدية للماتشات!!
• تبقى ابو تريكة..وتقعد 3 شهور مصاب..وتنزل تلعب برضوا ماتش انجلترا!!
• تبقى الاهلى..ومتذبذب..والفرق بتقرب منك اوى..وبشويش..وييجى الزمالك و الاسماعيلى يتعادلوا عشانك انت..وجماهيرهم خسروا بعض!!
• تبقى خالد الغندور..وييجى شوبير يتوقفله برنامجه..وعلاء صادق يتوقف فترة عن العرض..فتبقى البرنامج الوحيد الساعة 6 مع برنامج شبانة!!
• تبقى محمد شبانة..وبرنامجك الناس يشوفوه لو زهقوا من الغندور بعد ما كنت اخر نسبة مشاهده.
• تبقى الصقر احمد حسن..اللى التاريخ بيشهدلك بانجازاتك..بس العملية تطول شوية عشان المفروض ساعات تريح..ومع ذلك بدانا نحس ان الماتشات الدولية بتتعمل عشان تبقى عميد لاعبى العالم..يارب تكسرها عشان كابتن شحاتة ممكن يغيرك!!
• انك مايبقاش اسمك عماد متعب بس؛مش عماد حسن شحاتة..وتلعب اساسى كده كده!!
طب مين اللى ضربت معاهم عكسى ياترى..وشربوا كوكا فقرى!!
كوك فقرى يعنى انك..
• تبقى هيثم السعيد..وتسيب الزمالك بيتك..وتروح لِجَنة الاهلى..فتنافس على الهبوط!!
• تبقى شوبير..وتطلع واثق ان مفيش حكم حيتنفذ عليك..فييجى الوزير يوقف عرض البرنامج عشان هو اقوى منك مكانا.
• تبقى حازم امام..ومحدش عارف ايه اللى حصل فى مستواك..وييجى حسام حسن عشان يعرفك ان اللعب للملتزم والفايق بس!!
• تبقى الميرغنى..وتماطل فى تمديد عقدك السنة اللى فاتت..فتتركن خالص ويمكن تتنسى ..وتستنى عرض الاتحاد القادم..اللهم الا عودتك لمستواك اللى شفناه من غير مماطلة مع الزمالك!!
• تبقى واحد بتلعب فى نادى درجة تانية..وييجى الاسماعيلى وفرق الوسط تفاوضك.. فيضحك عليك القيعى ويخليك تمضى..وتقعد اسير الدكة ويستغنوا عنك بعد كده.
• تبقى جدو..وتمضى للزمالك..وتسافر انجولا وانت نايم صاحى بتحلم بتفعيل العقد لما ترجع..وييجى شحاتة يخليك اسطورة انجولا..وترجع وتتمرد على الزمالك..وتنكر..وتبقى احد عجائب الدورى دلوقتى فى هبوط المستوى!!
• تبقى فريق كورة لليد بالزمالك..ومستواك لا يقهر..واسطورة اليد المصرية دون منازع.. وبرضوا الاضواء بعيد عن نجومك..والفلوس بعيد عن جيوب لاعبيه الرجالة!!
• تبقى حسام حسن..ويبقى حظك ان كل ماتشات الدور التانى اغلبها برة ارضك!!
• تبقى احمد المحمدى..ويجيلك العرض رقم 33 من فرق انجليزية ويطلب 2 مليون استرلينى غير مصاريف الشحن..فالصفقة تفشل!!
• تبقى حسام البدرى..وحسين ياسر اللى تستغنى عنه يتألق فى الزمالك.
• تبقى اسماعيلاوى..وتتمنى حارس مرمى سوبر بسبب غلطات صبحى..فيجيلك الحضرى السد العالى..فتتحول احلامك لكابوس.
• تبقى مدحت شلبى..فيبقى ليك لزمة"مساء الانوار"..فتقلبها برنامج..فتضرب كرسى فى الكلوب مع جماهير الزمالك..فيبقى "مساءك ضلمة" معاهم!!
• تبقى جماهير سوهاج..وتقعد تشجع الاهلى..اقصد الجونة..وتشتم الزمالك بدون اى داعى..وبرضك الزمالك يكسب عشان هو كبير..وتتقهر يا عينى عليك والحدق يفهم!!
• تبقى عمرو زكى وميدو..وتسيبوا نادى الزمالك فى امس الحاجة ليكم عشان الاحتراف ..وللاسف فرقكم تصارع الهبوط..والزمالك يتقدم!!
ياسلام لو الناس تفهم ان الدنيا مش دايمه لحد..ان يوم ليك ويوم عليك..انك كما تدين تدان..والله كان فيه حاجات كتيرة اوى اختلفت فى حياتنا..بس للاسف..الوسط الرياضى الجميل فى مصر.. وسط كله عشوائية ومجاملات..فعمره ما حتحس ان فعلا اللى بيخلص بس حيستمر..ياسيدى.. نحن فى عصر الهمبكة!!