5مواقف شقية لسه بيذلونى بيهم!!!!!!!!!!!!!!!!!!!!

بســم الله الـرحمــن الرحيــم

همة 5 مواقف عملتهم ايام الشقاوة وانا لسه عيلة بس مذلولة بيهم ذل غير عادى
اولهم وانا لسه عندى سنة او سنة ونص تقريبا معرفش همة الى بيحكوا كل الى عملته رحت لماما شديت هدومها وقلتلها ممم-اكل يعنى-قالتلى استنى لما ابوكى ييجى حذرتها تانى وقلتلها مممممممم قالت قلتلك لما ابوكى ييجى قلت احذرها مرة كمان يمكن تتعظ مممممممممممممم ولا سالت فيا ولان فى الجيش بيقولك اتصرف رحت المطبخ شديت حلة البامية -الى امى حتى الان بتحلف مطبختش زيها-ووقعتها عالارض وجبت طبق وشلت بايديا وحطيت فالطبق واخدته ورحت لماما تخيلوا بقى الصدمةاجت تضربنى اتحاميت فالقوة العظمى-جدتى الى هية حماتها-وكل بامية وانتم بخير

التانى برضه كان عندى سنة ونص-شكل كان فى مجاعة الفترة دى- وجدتى طلعت لوالدتى صدر وزة بلدى فى طبق شوربة وما ادراك صدر وزة متزغطة بقى فماما حطتها ففرن البوتجاز ونزلت تعمل حاجة تحت فشقة جدتى طلعت لقت الدقرمة الصغيرة-انا وبلا فخر-ماسكة صدر الوزة وحاضناه والشوربة مغرقة هدومى اول لما شفتها زغرتلها وتمسكت باوزتى وقلتلها تعتى-بتاعتى يعنى-يا بنتى هاتيها اشيلك الجلد بس بعدت لورا وازددت تمسكا بها وقلتلها تعتى يابنتى الجلد سمين حيموتك لو كلتيه بعدت اكتر وتحفزت لاى هجوم مفاجئ وقلتلها تعتى اعععععععع
وبعد محاولات مستميتة استطاعت امى انتزاع الجلد فقط ومش قدرت تاخد اكتر من الجلد!!!!!!!جدعة انا صح؟؟؟

التالت كان فى ميتم خالى الله يرحمه-الف رحمة ونور تنزل عليك يا خالو-وكان متوفى وهو شباب وطبعا الناس كلها زعلانة وبتعيط رحت عند الرجالة وانا ماسكة ضفدعة وسط مش كبيرة ولا حاجة-كانت هوايتى الضفادع والدبابير المتلونة ليل نهار اجرى وراهم-المهم اخدت الضفدعة ورحت جنب واحد لحسن حظى ولسوء حظه كان بيترعب من الضفادع قلتله بص ياعمو معايا ايه وحطيتها قدام وشه وهى فايدى وعينك ما تشوف الا النور لقيت ده صرخ وطلع يجرى وانا بقى مش اخزى الشيطان واسكت واشوفلى لعبة لا طلعت اجرى وراه وهو يصرخ وانا وراه ماسكة الضفدعة واضحك وطبعا كان موقف كفيل يخلى الناس كلها فالميتم تضحك وبهيسيريا لحد ما جدى نجده من ايدى

الرابع كنا جايين من شمال سيناء لبلدنا وكان لسه عندى 5 سنين وراكبين فالعربية وورانا فالكرسى الاخير ولاد شباب تعالى يا عسل تعالى يا سكر فماما قالت روحى رحت وانا قاعدة العب بالمداليات والمحافظ بتاعتهم-كانت لسه الموبايلات مش طلعت-فلاحظت محلات جزارة كتير جدا مشفتش زيها فشمال سيناء فما كان منى سوى ان صرخت فرحانة باكتشافى بابا بابا اللحمة طلعت يابابا والدى مش قال حاجة غير الله يسامحك يا شيخة فضحتينا وقعد يبرر للناس الى فالعربية بعد لما خلصوا ضحك ان مفيش محلات جزارة فشمال سيناء زى هنا ووووو
وانا يعنى كنت اعرف منين ان اللحمة مش بتتزرع؟؟؟؟؟؟؟!!!!!!!

الخامس والاخير كان وانا عندى 11 سنة كنت عند اخوالى وفالبرندة-بلكونة كبيرة فالدور الارضى-كان عيال خالى بيلعبو طلعت من البيت بقى وانا على سنجة عشرة ومسرحة واخر تمام قالولى تعرفى تعملى الحركة دى ؟وراح واحد فيهم طلع يجرى من اول البرندة لاخرها وسند على السور وقعد عليه ولانى مقدامة ومش بخاف من اى مواجهة قلتله وبالفم المليان اه طبعا اقدر وطلعت اجرى من اول البرندة لحد موصلت السور بس مسندتش ونطيت عشان اقعد على طول وبعيد عن السامعين لبست فشجرة المشمش الى جنب السور واتزرعت زرع بصل راسى تحت ورجليا فوق ولما تنبهت للفاجعة الكبرى-وادى اخرة الشجاعة-طلعت اجرى على البيت وبعد شوية طلعتلهم وانا منتصرة -انتصار كاذب من كسفتى- وقلتلهم حد يقدر بقى يعمل الحركة دى؟؟؟؟؟؟؟؟؟؟وطبعا انتو عارفين الاجابة

والمواقف دى لما بجادل كتير بيطلعوا كشاهد ودليل انى .............. بلاش احراج بقى اكيد عارفين[size="5"][/size]